E Sunntig Nomidag uff dr Rüttihard - dört zwüsche Muttenz und Münchestai
Hane bitzli miesse schwanger goh
do sin e baar Erinnerige ko:
Ych, dr Stiefeli, zämme mit dr Roverrotte
hän dört obe folgendes botte:
S het grägnet, grägnet, ganzi Bäch vom Himmel
für e Fidel s richtig Wätter für e Fimmel
Vom Babbe het är - ischs eso? -
dr Autoschlüssel gscht...-überko
E schöne hälle suubere Citroen isch es gsi, e Superstuehl
Dr Fidel meint: S isch höggschti Zyt! -
dir kömmet alli, wenn der wänd, e bitz in d Autischuel
Gschifft hets wie gsait, au sunscht isch alles do
do e Ströössli, dört e Fäldwäg, Glungge, Pfütze
d Hose hesch scho lang nümm könne vorem schprütze schütze
Drzue Ägger rächts und linggs, so ganz früsch pflüegti
Do sait dr Fidel: Loos, Stiefeli, hogg ans Stüür und
heb kai Schiss, loos aifach was i sag und füeg di
Das hani gmacht und ha mit Händ und Fiess
aagfange ummefummle an däm Kaare
und bi denn zäh Sekunde spööter
mit eme Rächtsdrall grad in Agger yne-
und au wieder usegfahre.
(A propos Rächtsdrall: S isch, und sicher blybts drbyy
in allne Johr bis hütt dr einzig gsi...)
Wieder zrugg zum Citroen
usekoo ischs tres bien:
D Hydraulik isch ganz oobe gsi
dr Citroen unde bruun
Dr Fidel dänggt: Sag numme jetz nit:
Again coming soon.
Das waiss i ganz genau
- du au?
Dann noch eine prosaische Reminiszenz:
Unseri Rotte het e Name bruucht. Ain vo uns het im Himalaya e Bärg gfunde - e schöns Wort: NILKANTA. So simmer über e Wuchenänd uf d Ramschtai gloffe - und i glaub, dass dr Räscht em Fidel syni Idee gsi isch:
Am Zwölfiznacht, by candlelight, hämmer is vom Ramschtaifelse abgsailt und hän unsere Name, jede e Buechstabe: n-i-l-k-a-n-t-a, mit Hammer und Maissel us dr Sitzschlinge in d Felswand yygraviert.
Me sötts hütt no könne gseh...
Und , Fidel, waisch no:
Unsere änge Käller hinderem Holzgatter z Birsfälde, mit de Fässli-Hogger, wo dr Suri vom Babbe vom Warteckbier griegt het, dr eleggtrisch Grill het gsummt, mr hän diskutiert und gsunge. Schön hämmers gha.
Öbbis woni nümm rächt waiss:
An zwai Roverschwärt kan i mi erinnere - ans regionali bi Brugg umenand, mit Gummiboot über d Reuss und so... (wo mer glaub zweite worde sin) und ans nationali im Gjätt um e Pilatus (23.Rang, wägeme verstuuchte Fuess). Bisch au drby gsi?
No comments:
Post a Comment